22 март   дар  майдони варзишии  деҳаи   Барзуди Ҷамоати  ба  номи Назаршо Додхудоеви  ноҳияи Рӯшон  ҷашни Наврӯз бо ҷалолу  шукуҳи   хоса  таҷлил   гардид.

  Дашти Барзуд    беш  аз  30 сол  боз чунин маросими пуршукуҳро   дар  ёд надорад. Насли миёнсолу калонсол шоҳиданд, ки  дар даврони  ҳукмронии Давлати Шӯрави санаҳои  таърихии 1 май  ва  7   ноябр  дурӯзӣ  таҷлил мегардиданд ва    Дашти  Барзуд  дар  ин рӯзҳо ҷойи  асосии  баргузории  ин ҷашнҳо   буд. Намоишу  раҳпаймоиҳои оммавӣ бо шиору   овезаҳо, барномаҳои  ҷолибу  рангоранги фарҳангӣ,  мусобиқаҳои  гуштигирӣ ва аспдавонӣ бо иштироки  беҳтарин паҳлавонону човандозон ва дигар  тадбирҳои  идона хеле  хотирмон ҷараён мегирифтанд.  

   Бузургдошти  соли  нави  миллӣ – Наврӯз,  ки дар ин макони   таърихӣ бори аввал дар сатҳи  ноҳиявӣ баргузор  гардид, бо вусъату фарогирии тамошобин,   ба роҳ мондани  намоиши  маҳсулоти  кишоварзӣ ва ҳунарҳои  нафиса, омода  намудани майдонҳои   бозиҳои  кӯдакона,  фурӯши анвои гуногуни маводи  ғизо ва  дигар  ҷузъиёти марбут  ба  ҷашни    Наврӯз  воқеан ҳам камназир  буд. Ду ҳафта қабл  бо кӯмаки мақомоти  иҷроияи ҳокимияти  давлатии  ноҳия ва сокинони  деҳаҳои  Дерзуд  ва  Барзуд  дар майдони варзишӣ корҳои  таъмиру  тармим бо суръат ҷараён  гирифта,  нишастгоҳҳои иловагӣ ва  минбар бунёд  ёфтанд…

   Маросими идона  соати даҳ  оғоз  гардид.  Намояндагони  расмии   сатҳи ҷумҳурӣ, вилоят ва  ноҳия — вазири нақлиёти   Ҷумҳурии Тоҷикистон  Худоёрзода Худоёр, муовини аввали расии ВМКБ  Алишер  Мирзонаботов,  узви Маҷлиси миллии Маҷлиси Олии Ҷумҳурии Тоҷикистон, раиси ноҳия  Фаррух Додхудо ва  дигар  шахсонро дар  даромадгоҳи   варзишгоҳ  бо  русуми суннатӣ –дафнавозии  бонувон, бӯйгиёх, шогунайбун, табақай ва  шерхонии  наврасон  истиқбол  гирифтанд.

  Намояндагони  расмӣ нахуст аз   намоишгоҳи ҳунарҳои   нафиса ва  маҳсулоти кишоварзӣ    дидан карданд. Ҷамоатҳои  деҳот,  муассисаҳои таҳсилоти миёнаи умумӣ  ва  идораву  муассисаҳои  ноҳия намунаҳои  ҳунарҳои пухтупаз,  бофандагӣ,  дӯзандагӣ,  наққошӣ, кандакорӣ, оҳангарӣ, чӯбтарошӣ, анвои   гуногуни маҳсулоти кишоварзиро ба маърази  тамошо ва савдо  гузошта  буданд. Растаи   намоишгоҳро,  инчунин  созу  рақсу наво зебу  шукуҳи  бештар  мебахшид. Аз  номи  мақомоти иҷроияи  ҳокимияти  давлатии  ноҳия  ба 23  нафар атфоли ниёзманд ба маблағи  2600 сомонӣ,  барои  2  ҷуфт  арӯсу   домод  600 сомонӣ ва барои 7 нафар собиқадорони меҳнат  1400 сомонӣ   тақдим  гардид.

   Намояндаи  Ҳукумати Марказӣ, вазири  нақлиёти Ҷумҳурии Тоҷикистон Худоёрзода  Худоёр  ва  муовини аввали   раиси ВМКБ Алишер  Мирзонаботов   ҳозирин ва  дар симои  онҳо  мардуми Рӯшонзаминро  ба муносибати  ҷашни  Наврӯзи байналмилалӣ   табрику  таҳният  намуда, барояшон дар  кору  рӯзгор ва  ободии  Ватани маҳбубамон комёбиҳои рӯзафзунро таманно  карданд.

    Дар қисмати  фарҳангии маросими идона барномаи театрикунонидашудаи   бахши фарҳанги ноҳия ва  маъмурияти мактабҳои №6,7,8 ва  9  таҳти унвони  «Файзи Наврӯз» ба намоиш  гузошта  шуд.  Сухани шодбошии  поягузори Наврӯз, шоҳи нимасотирии Иронзамин – Ҷамшед,  рақсу  суруд ва  бозиҳои  гуногуни миллӣ  табъу  хотири ҳозиринро болида  гардонданд.

   Бахши  навбатии   барномаи идона аз  мусобиқаҳои гӯштӣ,  волейбол,  баскетбол, вазнбардорӣ ва  арғамчинкашӣ  иборат   буд. Бахусус, бозии волейбол  чун ҳарсола  хеле  шавқовар   баргузор  шуд. Дар  бозии  финалӣ  дастаи «Вамар»  бар дастаи «Спонҷ»  бо ҳисоби  3:0    пирӯз  нардид. Ба ҳар яки  ин  дастаҳо    аз ҷониби  вазири нақлиёт Х.Худоёрзода ва  муовини  раиси ВМКБ А. Мирзонаботов 2000 сомонӣ ва  аз ҷониби  мақомоти  ноҳия мутаносибан 1500 ва  850 сомонӣ тақдим  шуд. Дар мусобиқаи гӯштии миллӣ паҳлавонони  ноҳияҳои Шуғнон, Роштқалъа, Ванҷ ва  шаҳри Хоруғ  низ  ширкат  варзиданд.  

   Мақомоти  иҷроияи  ҳокимияти  давлатии  ноҳия   барои мусобиқаҳои варзишии  наврӯзӣ – волейбол,  баскетбол, шоҳмот, вазнбардорӣ ва арғамчинкашӣ  дар маҷмуъ маблағи 3100 сомониро  сарф  намуд.

   Ҷашни Наврӯз  аз оғоз  то анҷом дар фазои суруру  шодмонӣ, дӯстию  бародарӣ  ва иттиҳод ҷараён  гирифта,  оммаро  ба ободкориҳои нав ба нав руҳбаланду  раҳнамун   намуд. 

                                                                                                  «Пайғоми Рӯшон»