Оҳангарӣ навъе аз ҳунарҳои суннатӣ ба ҳисоб меравад, ки аз замонҳои пеш то ба имрўз миёни мардуми тоҷик арзи ҳастӣ мекунад, чун муҳимтарин ашёи рўзгор ва дигар маҳсулоти ниёзи мардумро аз оҳан истеҳсол мекунанд. Дар шароити имрўза пешаи оҳангариро дар тамоми гўшаву канори Тоҷикистон мушоҳида кардан мумкин аст. Аммо дар ноҳияҳои дурдаст мардуми маҳаллӣ нисбати ин касб бештар таваҷҷуҳ доранд. Зеро асбобҳое, ки аз оҳан таёр карда мешаванд, барои мардуми деҳа бештар зарур мебошад. Ба хотире, ки дар деха мардум бисёртар ба кишту кор ва зироаткорию боғкорӣ машғуланд. Дар ин сурат асбобҳои аз оҳан тайёр намуда эҳтиёҷи онҳоро бароварда мегардонад. Аз оҳан асосан корд, теша, табар, доси гандумдаравӣ, доси алафдаравӣ, белу каланд ва ҳар гуна ашёи рўзгорро омода мекунанд.

Бо эълон гардидани соли 2018 – “Соли рушди сайёҳи ва ҳунарҳои мардумӣ” ва солҳои 2019 – 2021 – “Солҳои рушди деҳот, сайёҳи ва ҳунарҳои мардумӣ” бошандагони деҳаҳои дурдасти ноҳияи Рушон низ ба эҳё намудани ҳунарҳои мардумӣ ва равнақ додани онҳо зиёдтар назар андохтанд.

Одинаев Одина Чумъаевич, сокини деҳаи Даржомчи ҷамоати деҳоти Бартанг аз зумраи он шахсонест, ки таи 3 – 4 соли охир ба ҳунари (касби) оҳангарӣ машғул буда, олотҳои рўзгорро аз қабили теша, табар, доси гандумдаравӣ, доси алафдаравӣ, белу каланд ва дигар асбобҳои оҳанине, ки дар кору рузгори мардуми деҳа истифода бурда мешаванд, омода мекунад. Ба қавли Одинаев Одина – “Ҳангоми машғул шудан ба ин кор роҳат мекунам ва вақтҳои холигиамро пурра ба омода намудани олотҳои рўзгор аз оҳан мебахшам”.

        Давлатмамадов Қаландар