Бо ташаббуси Маркази Орхусии шаҳри Хоруғ бо мусоидати шуъбаи ҳифзи муҳити зисти ноҳия  дар китобхонаи системаи марказонидашудаи ноҳия семинарии экологӣ таҳти унвони «Конвенсияи Орхус ва қонунгузори Ҳукумати Ҷумҳурмии Тоҷикистон дар соҳаи ҳифзи муҳити зист»  баргузор гардид. Дар  он кормандони соҳаҳои мухталиф ширкат варзиданд.

Мудири шуъбаи ҳифзи муҳити зисти ноҳия Н.Давлатмиров семинарро ифтитоҳ намуда, сипас, корманди Маркази Орхусии шаҳри Хоруғ Хоҷамир Қурбонбеков роҷеъ  ба фаъолияти Маркази Орхусии Хоруғ оид ба амал гардонии Конвенсия Орхус ва ҷалби аҳолӣ  ба ҳалли масъалаҳои ҳифзи муҳити зист сухан ронда, арз намуд, ки ҳадафи Конвенсия ном бурда дастгирии ҳуқуқҳои инсон  ба муҳити зист барои саломатии вай мусоид,  дастрасӣ ба иттилоот, ширкати аҳли ҷомеа дар  ҷараёни қабули қарорҳо ва дастрасӣ  ба адолати судӣ дар масъалаҳои ҳифзи муҳити зист мебошад.

Сипас, Фарҳод Мамадназарбеков  мудири  шуъбаи ҳифзи муҳити зисти шаҳри Хоруғ роҷеъ ба Қонунгузории Ҷумҳурии Тоҷикистон дар соҳаи ҳифзи муҳити зист ва вазъи экологии ВМКБ ва дастрасии сокинон  ба ахбороти экологӣ ахборот дод. 

Дар фарҷом аз тарафи масъулин пешниҳод гардид, ки барои ҳалли масъалаҳои ҳифзи муҳити зист аҳли ҷомеа бояд даст ба даст зада, онҳоро дар якҷоягӣ баратаф намояд. Инчунин, қайд гардид, ки дар бархе аз муассисаҳои таҳсилоти миёнаи умумии шаҳри Хоруғ гуруҳҳои ҳаракати «Нозирони сабз» ташкил гардидааст, ки хонандагон дар  самти тоза нигоҳ доштани гирду атроф ва ҷуйборҳои раҳгузар ва дигар корҳои ободонию созандагӣ корҳои назарасеро анҷом додаанд, ки фаъолияташон шоистаи таҳсин аст ва мебоист чунин гуруҳҳоро дар дигар муассисаҳои шаҳру ноҳияҳо  низ ҷоннок  гарданд ва дар ин раванд якҷоя бо шуъбаҳои ҳифзи муҳити зист  дар ободонию созандагӣ ҳисса гузорӣ намоянд.

С.Дустова