Вируси норасоии масунияти одам (ВНМО) имрӯз аз масъалаҳои мубрамтарини ҷомеаи ҷаҳонӣ шинохта шуда, аз сол ба сол босуръати баланд доман паҳн мекунад. Ин вабои қарни ХХ1 дар кишварамон, бахусус, дар қисме аз ноҳияҳои ВМКБ, аз ҷумла, ноҳияи Рӯшон дар вазъи хеле нигаронкунанда қарор дорад.
Рӯйи ҳамин манзур 2 майи соли равон дар толори хурди мақомоти маҳаллии ҳокимияти давлатии ноҳияи Рӯшон ҷаласаи Шӯрои ҳамоҳангсозии мақомоти ҳифзи ҳуқуқи ноҳия бо баррасии масъалаи “Иҷрои Кодекси тандурустии Ҷумҳурии Тоҷикистон дар самти муқовимат бо вируси норасоии масунияти одам (ВНМО) ва бемории пайдошудаи норасоии масуният ва Барномаи миллӣ оид ба муқовимат бо вируси масунияти одам барои солҳои 2017-2020” баргузор гардид. Дар ҷаласа, инчунин, масъулони идораву муассисаҳо ва халифаҳои расмии деҳоти ноҳия бо даъват ҳузур доштанд.
Дар маърӯзаи прокурори ноҳия Низомзода Бахтиёр масъалаи мазкур ҳамаҷониба бо зикри мушаххаси мисолу нуқсонҳои ҷойдошта таҳлил гардид.
Перомуни маърӯзаи прокурори ноҳия сардори Маркази пешгирии ВНМО ва БПНМ-и ноҳия Зафар Ғазалов,, сардухтури табобатхонаи марказии ноҳия Худоназар Мардонаев, котиби иҷроияи КИМ-и ҲХДТ дар ноҳия Холиса Бодурхонова, мудири бахши занон ва кор бо оила Гулдона Меҳралиева, мудири бахши ҳифзи иҷтимоӣ Бахтибек Бахтибеков, халифаи расмии деҳаи Хуф Қадамшо Қадамшоев ва ёрдамчии прокурори ноҳия Муллозода Муҳаммадризо фикру мулоҳизаронӣ намуда, барои беҳбуди кор пешниҳодҳояшонро ба миён гузоштанд.
Ҷаласаи шӯроро муовини аввали раиси ноҳия Гулмаст Дӯсталиев пеш бурд ва ҷамъбаст кард.
“Пайғоми Рӯшон”