Мо як гуруҳ занони ноҳияи Рушон амали ваҳшиёна ва мусаллаҳонаи гуруҳи террористӣ ва экстремистии ДОИШ-ро маҳкум медорем.

         Ҳодисаи нангине, ки шаби 6-уми ноябри соли равон дар яке аз дидбонгоҳи ноҳияи Рӯдакӣ аз тарафи гуруҳи террористӣ рух дод, моро бетараф намонд ва аз ҳама ташвишовараш он, ки дар ин гуруҳ занон- модарон низ иштирок доштанд.

Мо он ҳодисаҳои мудҳише, ки дар солҳои 90-уми асри 20 рӯй дода буданд, ҳеҷ гоҳ фаромӯш карда наметавонем. Чандин модарон аз шавҳар, хоҳару бародар ва ҷигарбандони хеш ҷудо гардиданд, дар хонаву манзили мардум оташи ҷанги бародаркушро аланга доданд, ки ин ба валангор гардидани кишвари тоҷикон ва несту нобуд шудани эҳсоси ватандории мардум оварда расонид.

Мо  аз нав такрор шудани ин рузҳоро намехоҳем ва намемонем.

Мо нафрат дорем ба он мардони ватанфуруш, ки занону фарзандони худро ба ин гуруҳҳои худ шомил намуда, онҳоро дар амалҳои бадбахтонаи худ истифода бурда истодаанд.

Наход модари тоҷик қодир ба он аст, ки фарзандонашро аз зиндагиашон маҳрум созад, аз нав алангаи ҷангро дар ватанаш  даргиронад. / модар нест ва сазовори номи Зан-Модарро надорад.

Зан дар оилаи тоҷикон ҳамеша нақши асосӣ дошт ва дорад. Зеро иффату зебоӣ, фурӯтаниву маърифатнокӣ хоси зан буда, ба  зиндагии мард ва аҳли хонадон таровату покизагӣ мебахшад.

Маърифати зан ба фарзандонаш таъсири амиқ расонда, агар модар китобхон, боиффат, бомаърифат ва донишманд бошад, фарзандон низ майл ба донишу маърифат карда, хислатҳои неки модарашонро дар худ парвариш медиҳанд ва ба модарашон пайравӣ мекунанд. Дар зиндагӣ пешоҳанг будани зан ва маърифатнок буданаш имкон медиҳад, ки сатҳи маънавии оила баланд шуда, кӯдакон ва дигар аъзои оила маърифатнок тарбият ёбанд.

         Мо  модарон ба ояндаи неки кишварамон боварии комил дошта, тамоми ҳастӣ,  дониш, таҷриба ва марифати худро барои ҳифзи дастовардҳои истиқлолият ва ободии Ватани азизамон ба харҷ медиҳем ва сиёсати пешгирифтаи Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистонро дастгирӣ мекунем.

Мудири бахши кор бо занон ва оилаи мақомоти иҷроияи ҳокимияти давлатии ноҳияи Рушон    Мералиева Г.