Санаи 11 – уми июни соли равон бо ибтикори Мақомоти иҷроияи ҳокимияти давлатии ноҳияи Рушон дар қасри фарҳанги ноҳия 90-солагии зодрӯзи яке аз шахсиятҳои маъруфу муътабари ҷумҳурӣ, ходими намоёни давлатӣ ва сиёсӣ, собиқ Раиси Президиуми Шурои Олии Ҷумҳурии Тоҷикистон шодравон Ғоибназар Паллаев баргузор гардид.

      Дар чорабинӣ муовини якуми раиси Вилояти Мухтори Куҳистони Бадахшон Алишер Мирзонаботов, раиси ноҳия Додхудоев Фаррух, сардорони идораву муассисаҳо ва хешовандони наздики Ғоибназар Паллаев иштирок доштанд.   

       Ғоибназар Паллаев аз ҷумлаи он шахсиятҳое буд, тамоми умри пурбаракаташро барои хушбахтии миллат, пойдории давлат ва шукуфоии Ватан бахшида буд.  Зинаҳои фаъолияти меҳнатиаш – аз агрономи оддӣ сар карда, то Раиси Президиуми Шӯрои Олии Ҷумҳурии Тоҷикистон, намунаи олии ватандӯстӣ  ва фидокорӣ мебошанд.

      Ғоибназар Паллаевро дар сар то сари ҷумҳурӣ аз водии Вахш то минтақаи Кулоб, аз Суғд то Бадахшон аз Раштон то Ҳисору Зарафшон чун шахси ватандӯст, меҳнатқарин, ташаббускор, масъулиятшинос ва инсони комил шинохта, то имруз номи ӯро ба некӣ ба забон мегиранд.         

     Мақомоти иҷроияи маҳаллии ҳокимияти давлатии вилоят минбаъд ҳам гиромидошти чунин шахсиятҳоро, чун анъанаи дерина идома медиҳад, қайд намуд дар баромадаш Муовини якуми раиси ВМКБ Алишер Мирзонаботов.

    Дар ҷараёни барнома раиси собиқадорони ҷангу меҳнат М.Замонов, ҳамсинфаш Баҳром Додхудоев, рафиқони наздик А.Сафаров, Б.Муродов аз ҳаёт ва фаъолияти Ғоибназар Палаев баромад намуданд. Писараш Паллаев Мелик ба сухан баромада, барои қадрдонӣ ва ташкили чорабинӣ аз номи хешу табор изҳори миннатдорӣ баён намуд.

    Чорабиниҳои фарҳангӣ идомабахши чорабинӣ шуда, таасуроти хуб гузошт.