Ҳар нафас, ҳар қатра хун, ҳар тори сӯям тоҷик аст.
Шуҳрату шон, эътибору обрӯям тоҷик аст!
Ҳафт пуштам тоҷику ҳафтоду ҳафт пушт з- ориё,
Ҳам забону ҳам равон, ҳам ҷону хӯям тоҷик аст!
Зардуҳишту Мониву Ҷамшеду Кова аз ман аст,
Фахр дорам бо ниёгон з-он, ки кӯям тоҷик аст!
Дар сириштам шубҳае нест, панҷ ҳаввосам тоҷикист,
Ҳам басар, ҳам самъу ламс, ҳам завқу бӯям тоҷик аст!
Аз сари эҳсоси ботил ҳарф гуфтан хуб нест,
Шаш ҷиҳат-то умқи ҷон ҳар кӯю сӯям тоҷик аст!
Тоҷикӣ бошад хаёлам, тоҷикӣ кирдор ман,
Хислату пиндору рафтор, тобу рӯям тоҷик аст!
Рӯдакӣ, Фирдавсию Синову Носир ҷадиди ман,
Зоти Румию Аттор бегуфтугӯям тоҷик аст!
Бо ҳидоятҳои Пешво пеш мемонем қадам,
Ҷаҳд месозем мудом, рушду нумӯям тоҷик аст.
Гарчӣ андар зиндагӣ майлу ҳавас бошад зиёд,
Лек дар майдони маънӣ орзӯям тоҷик аст!
Миллати ман саҳм дорад дар ҷаҳон бо маърифат,
Бо дили муштоқу пазмон ҷустуҷӯям тоҷик аст!
З-аҳди бостон то кунун оини мо озодагист,
Қуввату дармони дил, рушду нумӯям тоҷик аст!
Асли худро мо зи Истиқлол бишнохтам зи нав,
Дар канори аҳли олам обрӯям тоҷик аст!
Давлати содиқ бигӯяд ин сухан аз сидқи дил,
То даме ки зиндаам, маъвою кӯям тоҷик аст!
Пайшанбе Давлатов- шоири шаҳири ноҳияи Рӯшон.