Баҳри дар сатҳи баланд пешвоз гирифтани 30-юмин солгарди Истиқлолияти давлатии Ҷумҳурии Тоҷикистон як қатор нақша чорабиниҳо дар идораву муассисаҳо, корхонаҳои давлатӣ ва хусусӣ таҳрезӣ гардида, аҳли ҷомеа дар амалӣ гаштани онҳо кӯшиши беш аз пешро ба харҷ дода истодаанд.
   Яке аз озмунҳои сатҳи ҷумҳуриявӣ – омуни “ТОҶИКИСТОН ВАТАНИ АЗИЗИ МАН”  мебошад, ки бевосита бо Амри Президенти мамлакат муҳтарам Эмомалӣ Раҳмон дар саросари ҷумҳурӣ баргузор мегардад.
   Амри номбурда соли ҷорӣ 11 феврал таҳти рақами АП-42 ба тасвиб расида, ба тамоми шаҳру навоии мамлакат бобати дар сатҳи баланд гузаронидани он ирсол гардид. Дар ин замина, Низомнома ва дигар муқаррароти баргузор гардидани он низ дастраси масъулини соҳа гардиданд.
    Дар 7 Ҷамоати ноҳияи Рӯшон даври аввали он бо омодагии ҳамаҷониба сурат гирифта, мувофиқи баҳогузории кормандони аҳли фарҳанг дар маҷмӯъ 58 нафари онҳо ба даври ноҳиявӣ роҳхат гирифтанд. 
   Даври ноҳиявии озмуни “ТОҶИКИСТОН ВАТАНИ АЗИЗИ МАН” 5 июни соли равон дар Қасри фарҳанги ноҳия баргузор гардид, ки дар он кормандони идораву муассисаҳо фаъолона иштирок намуданд.
   Узви Маҷлиси миллии Маҷлиси Олии Ҷумҳурии Тоҷикистон, раиси ноҳия Додхудо Фаррух Муборакшо перомуни санаи таърихӣ - 30-юмин солгарди Истиқлолияти давлатии Ҷумҳурии Тоҷикистон ва тантанаю чорабиниҳои хотирмоне, ки бахшида ба ин рӯз баргузор мегарданд, бо қаноатмандӣ сухан намуда, ба довталабон тавфиқ ва аз ҳайати ҳакамон баҳогузории арзандаро ба ҳунари иштирокдорон талаб намуд.
   Ҳайати ҳакамон бо роҳбарии сардори шӯъбаи фарҳанги вилоят Қурбонмамадов Сайёд ва аъзо Одинаев Силкабек, Алидодов Хушомад, Муборакшоев Эроншо, Ошурбеков Султонмамад, Чоршанбезода Лайло ва Бозидова Саодат ба ҳунарнамоии иштирокдорони озмун баҳогузорӣ намуданд.
     Мувофиқи натиҷагирии ҳайати ҳакамон 26 нафар иштирокчиёни озмун ба даври вилоятӣ роҳхат гирифтанд ва дар хотима аз ҷониби раиси ноҳия бо ифтихорнома ва мукофоти пулӣ қадрдонӣ шуданд.
     Итминони комил аст, ки ғолибони озмун бо ҳунари волояшон дар сатҳи вилояту ҷумҳурӣ низ барандаи ҷойҳои ифтихорӣ мегарданд.

                                      “ПАЙҒОМИ РӮШОН”