Таҷлили Рӯзи варзишгарон дар ноҳияи Рушон

Имрӯз, дар Боғи фарҳангии ноҳия бо иштироки раиси ноҳия Аҳмадзода Илҳом Шамол, роҳбарону намояндагони мақомоти иҷроияи ҳокимияти давлатии ноҳия, сохторҳои марбута, омӯзгорон, мураббиён, варзишгарон ва дӯстдорони тарзи ҳаёти солим, чорабинии тантанавӣ бахшида ба Рӯзи варзишгарон баргузор гардид.

Чорабинӣ бо садои Суруди миллии Ҷумҳурии Тоҷикистон оғоз ёфт. Сипас, раиси ноҳия суханронӣ намуда, варзишро омили муҳими таҳкими саломатии ҷомеа, рушди неруи зеҳниву ҷисмонӣ ва боло бурдани нуфузи кишвар дар арсаи байналмилалӣ арзёбӣ намуд. Ӯ таъкид кард, ки бо сиёсати хирадмандонаи Пешвои миллат муҳтарам Эмомалӣ Раҳмон дар саросари мамлакат барои рушди соҳаи варзиш шароити мусоид фароҳам оварда шуда, иншооти зиёди варзишӣ бунёд гардидаанд.

Дар ҷараёни чорабинӣ як қатор варзишгарони ноҳия, ки дар мусобиқаҳо натиҷаҳои назаррас ба даст овардаанд, бо ифтихорномаҳо ва бархе аз собиқадорони соҳаи варзиш бо тӯҳфаҳои хотиравӣ сарфароз гардонида шуданд.

Чорабинӣ дар фазои идона ва бо руҳияи баланди ватандӯстӣ анҷом ёфт.