Бинои  истиқоматии панҷошёна дар шаҳраки Вамраи ноҳияи Рушон аз ҷониби соҳибкоронӣ Ватани сохта ба истифода дода мешавад, ки  ин иқдоми созанда маҳз аз сиёсати созанда ва бунёдкоронаи  Роҳбари давлат сарчашма гирифта, имрӯз маркази ноҳия ба таври  шинохтанашаванда рушду нумӯъ ёфта истодааст. 

Бо дастгирии Ҳукумати Ҷумҳурии Тоҷикистон дар баробари дигар шаҳру ноҳияҳои ҷумҳури имрӯз дар Рушони равшандилон ҳам созандагиву бунёдкорӣ бо маром идома дошта, бо қомат афрохтани чандин биноҳои зебо дар маркази ноҳия шаҳодат аз ободонию бунёдкорӣ буда, заминаи хуб барои беҳбуди зисту зиндагии мардум мебошад.

Раиси Вилояти Мухтори Кӯҳистони Бадахшон Мирзонабот Алишер Худобердӣ бо лоҳиҳаи сохтмони хонаҳои баландошёна шинос гардида, барои ин иқдоми неки соҳибкор баҳри рушди ободониву бунёдкорӣ дар ноҳия сипосгузорӣ намуданд. Ҳамзамон ба раиси вилоят иттлоъ дода шуд, ки аз ҷониби соҳибкорон дар Ҷамоати деҳоти дурдасти ноҳия Рушон, Бартанг низ сохтмони меҳмонхонаи замонавӣ ба нақша гирифта шуда, рӯзҳои наздик дар он корҳои сохтмонӣ оғоз мегарданд. Водии Бартанг имрӯзҳо ба макони сайёҳӣ мубаддал гардидааст ва аз ин лиҳоз бунёди чунин меҳмонхона дар деҳаи Равмеди ин макони овозадор саривақтӣ мебошад.